Miradoiro de Vixía Herbeira
Un balcón aos materiais exhumados do manto terrestre
Como na punta do Limo, no miradoiro de Vixía Herbeira, situado entre os termos de Cariño e Cedeira, os nosos pés pisan peridotitas e piroxenitas que emerxeron do manto superior. Neste punto atopámonos a 613 metros sobre o nivel do mar. Os acantilados de Herbeira son os máis altos da Europa continental e forman un tapiz rochoso que se esborralla cara ao mar en pendentes vertixinosas, ofrecéndonos unha impresionante vista panorámica. A heteroxeneidade dos materiais que forman este macizo mantélico formula importantes incertezas para determinar a súa idade xeolóxica, especialmente no caso das peridotitas. O manto peridotítico orixinario da Terra é moi antigo, primordial, pero estivo suxeito a continuos episodios de modificación. As piroxenitas destes macizos son máis novas e considéranse de idade cámbrica.
No macizo de Herbeira, observando cara ao oeste, tense un lugar privilexiado para a contemplación da posta de sol sobre o Atlántico. A superficie culminante de Herbeira é considerada por algúns autores un elemento parcialmente residual da fragmentación de Panxea que propinou a apertura do océano Atlántico.
