Miradoiro de Vilariño
Un contraste de cores mexido polo vento
O miradoiro de Vilariño atópase ao pé dun dos muíños do parque eólico de Couce do Penido. Desde este punto situado a 467 metros sobre o nivel do mar, gozamos dunhas fermosas vistas da ría de Cariño-Ortigueira, desde a desembocadura do río Mera ata o seu final fronte a Cariño. Tamén se poder ver máis cara ao leste ata a punta de Estaca de Bares. A cor vermella das rochas contrasta co verde dos bosques e co azul do ceo e, ao lonxe, o mar.
Pero o verdadeiro tesouro deste lugar está baixo os nosos pés. Atopámonos no flanco sueste da serra da Capelada, sobre un afloramento de ecloxitas masivas, características do metamorfismo de alta presión e temperatura, formadas a profundidades de 70 km. Trátase de rochas máis densas que o granito e que son moi escasas na superficie terrestre. Pero neste lugar emerxeron para contarnos a remota historia da súa formación.
